Би eeрийнхeeрee урлаг ойлгоно

Сүүлийн үед транс хөгжим нэлээд сонсов. Толгойгоо өвтгөтөл их сонсохгүй бол дажгүй урсгал байв. Залуу хүний хөгжим гэдэгт маргах зүйл алга. Аливааг эрж хайсан, шинэ өнгө аясаар харах гэсэн сэдэлтэй байх нь илт.

-----=====-----

Дууг би эхлээд зүгээр л сонсдог. Нэг их анхаарахгүй л сонсдог. Тэгэхэд нэг юм хэлэх гээд байвал ахиад нэг сонсдог. Аянд нь төвлөрч сонсдог. Тэгээд дараа нь үгэнд (зарим нэг аязаа хасаад бусдад нь хамааруулъя) нь анхаарч нэг сонсоно.
Энэ бүгдийн давж чадсан дууг би урлагийн бүтээл гэж бодно.

Энэ бүтээлээ би байн байн сонсоно. Дуу амжилттай болох үндэс нь аяандаа байдаг болохоор ч тэр үү, миний сонсох дуртай дуунуудын ихэнх нь сонсголонтой аясыг шингээсэн байх юм.
Эдгээр дууны аяыг зүгээр нэг сонсохгүй ээ. Хөгжмийн нот мэдэх биш түүнд санаа зовохгүй л дээ. Харин хүчээ нэмэх хөгжмийн дугаралтанд зовиноно.
Хөгжим бүр өөрийн "ёолох" эгшгээр шинэ зүйлийг хэлнэ надад. Хамгийн тод дугарах хөгжмөнд анхаараад байх нь сонин биш. Хажууд нь даруухнаар өөрийн үгээ хэлэх тэр бусдад хандана.
Хаана ямар хөгжим юу гэж хэлж байгааг дунд нь орж сонсоно. Хажууд гитар, хойхоно бөмбөр, дэргэд төгөлдөр хуур, чанх дээр хийл. Хөгжим бүрт хандана, тэр бүгд үгээ хэлнэ.

-----=====-----

Зохиолч, бүтээлчид нь юуг үзүүлэх гэснийг бүү мэд. Харин би өөртөө шинэ зурагтай үлдэнэ.

-----=====-----